‌جه‌ننه‌تی: هه‌وڵه‌كانی ئه‌وروپا بۆ رزگاركردنی رێككه‌وتنه‌ ئه‌تۆمییه‌كه‌ سودی نابێت

وێستگه‌ نیوزـ

کەسایەتییەکی ئایینی دیاری ئێران كه‌ هه‌میشه‌ دژ بە ڕۆژئاوا قسە دەکات رایگه‌یاند: داواکارییه‌كانی ئەوروپا بۆ ئەنجامدانی گفتوگۆی زیاتر سەبارەت بە کۆمەڵێک بابەت لەوانە موشەکەکانی ئێران، هیچ سودێکی بۆ لە پاراستنی رێکكەوتنە ئه‌تۆمییه‌كه‌ی ئێران نییە.

ئایەتوڵا ئەحمەد جەننەتی سەرۆکی لیژنەی شارەزایانی ئێرانە و دەسەڵاتێکی زۆری هەیە، لەوانەش هەڵبژاردن یاخود لابردنی ڕابەری باڵای ئێران، کە بەرزترین دەسەڵاتە لە ئێراندا.

دەزگای هەواڵی کۆماری ئیسلامی ئێران لە زاری جەننەتییەوە بڵاویکردەوە " ئەوروپا ڕایگەیاندوه‌ کە دەستبەرداری ڕێكکەوتنەکە نابێت. بەڵام لە ڕاستیدا ڕێگەیەکی گونجاویان نەگرتوه‌تەبه‌ر."

لە چوارچێوەی هەوڵەکانیاندا بۆ رزگارکردنی رێكکەوتنامه‌ ئه‌تۆمییه‌كه‌ی ئێران، مانگی رابردوو یەکێتی ئەوروپا بڕیاریدا هاوكارییه‌ك بە بڕی 18 ملیۆن یۆرۆ بداتە بە ئێران، ئه‌وه‌ش وەک قەرەبوو بۆ شوێنەواری سزاکانی ئەمریکا.

هەفتەی رابردووش ژان ئیڤ لۆدغیان، وەزیری دەرەوەی فەڕەنسا وتی پێویستە لەسەر ئێران ئامادە بێت بۆ گفتوگۆکردن لەسەر پلانەکانی داهاتووی بەرنامە ناوەکییەکەی و موشەکە باڵیستیکییەکانی و ڕۆڵی وڵاتەکە لە جەنگی سوریا و یەمەندا، له‌ به‌رامبه‌ریشدا وەزارەتی دەرەوەی ئێران داواکەی فەڕەنسای رەتکردەوە.

سه‌ره‌ڕای بانگه‌وازی هاوپه‌یمانه‌كانی ئه‌مریكا، له‌ مانگی ئایاری 2018، دۆناڵد تره‌مپ، سه‌رۆكی ئه‌مریكا له‌ رێككه‌وتنه‌ ئه‌تۆمییه‌كه‌ی ئێران كشایه‌وه‌ كه‌ ساڵی 2015 واژووی كردبوو.

واشنتن سزای نوێی به‌سه‌ر ئێراندا سه‌پاند و رۆژی دووشەممە 6ی ئابی 2018، ترەمپ واژووی لەسەر گەڕاندنەوەی سزاکانی سەر ئێران کرد ئه‌و به‌ڵێنانه‌ی برده‌سه‌ر كه‌ له‌كاتی بانگه‌شه‌ی هه‌ڵبژاردنه‌كانیدا بۆ گرتنه‌ده‌ستی پۆستی سه‌رۆكی ئه‌مریكا دابووی.
 رۆژی سێشه‌ممه‌ 7ی ئابی 2018، تره‌مپ دوایین هەڵوێستی لەسەر ئەو بڕیارەی راگەیاند و سزاكانی سه‌ر ئێرانی واژوو كرد و خستییه‌ بواری جێبه‌جێكردنه‌وه‌.

سەرۆکی ئەمریکا لە هەژماری خۆی لە تۆڕی کۆمەڵایەتی تویتەر پەیامێکی بڵاوکردەوە و نوسیویەتی: "ئابڵوقەکانی سەر ئێران بە فەرمی چەسپان، ئەمانە دژوارترین ئابڵوقەن تا ئێستا سەپابن".

ترەمپ دەشڵێت: "لە مانگی 11، ئابڵوقەکان دەچنە قۆناغێکی دژوارترەوە، هەرکەسێک بازرگانی لەگەڵ ئێران بکات، بازرگانی لەگەڵ ئەمریکا ناکات، من تەنها داوای ئاشتی جیهانی دەکەم، هیچی دیکە!".

ئەمریکا ناڕازییە لە هەوڵەکانی ئێران بۆ دەستوەردان لە وڵاتانی ناوچەکە و دەیەوێت لە رێگای سزاکان فشاری تەواو دروستبکات تا تاران لە پەلهاوێشتن بۆ رۆژهەڵاتی ناوەڕاست پەشیمان بکاتەوە، تارانیش هەم رەتیدەکاتەوە و هەمیش سورە لەسەر ئەوەی سزاکانی ترەمپ چۆک بە کۆماری ئیسلامی دانادەن.

بڕیاروایه‌ له‌ 5ی نۆڤه‌مبه‌ری 2018، ئه‌مریكا بەشی دووەمی سزاکانی بەسەر ئێراندا بسەپێنێتەوە، لەم بەشەدا هەناردەکردنی نەوت و گازی ئێرانی قەدەغە دەکرێت، ئه‌مریكا ده‌ڵێت هه‌ر وڵات و لایەنێک هاوردەی ئەم دوو سەرچاوە سەرەکییەی داهاتی ئێران بکات، ئه‌ویش روبەڕوی سزاکانی واشنتن دەبێتەوە.


AM:08:35:05/09/2018


ئه‌م بابه‌ته 1188 جار خوێنراوه‌ته‌وه‌‌