بەرهەم ساڵح پەیامیك ئاڕاستەی پارتی دەكات
بەرهەم ساڵح
وێستگە نیوز-
بەرهەم ساڵح، سەرۆكی هاوپەیمانی بۆ دیموكراسی و دادپەرورەری پیرۆزبایی ساڵیادی دامەزراندنی پارتی دەكات و دەڵێت، بەو ئومێدەی ئەم یادە ببێتە مایەی ئەوەی لەم ھەلومەرجە ھەستیارەی عیراق و ھەرێمی كوردستاندا ھەموو لایەك لە سۆنگەی بەرپرسیاری و رەچاوكردنی بەرژەوەندیە باڵاكانی گەلەكەمان، بپرژێینە سەر ئەوەی بەرنامەی تۆكمە بۆ روبەڕوبونەوەی ئەگەرو پێشھاتەكان گەڵاڵە بكەین.
بەرهەم ساڵح، سەرۆكی هاوپەیمانی بۆ دیموكراسی و دادپەروەری لە پەیامێكدا بۆ مەسعود بارزانی سەرۆكی پارتی دیموكراتی كوردستان، نێچیرڤان بارزانی جێگری سەرۆكی پارتی و ئەندامانی مەكتەبی سیاسی و سەركردایەتی ئەو حزبە پیرۆزبایی یادی ٧٢ ساڵەی حزبەكەیان لێكردوون.
بەرهەم ساڵح رایگەیاندووە "بەو ئومێدەی ئەم یادە ببێتە مایەی ئەوەی لەم ھەلومەرجە ھەستیارەی عیراق و ھەرێمی كوردستاندا ھەموو لایەك لە سۆنگەی بەرپرسیاری و رەچاوكردنی بەرژەوەندیە باڵاكانی گەلەكەمان، بپرژێینە سەر ئەوەی بەرنامەی تۆكمە بۆ روبەڕوبونەوەی ئەگەرو پێشھاتەكان گەڵاڵە بكەین و یەكڕیزی بە ئاراستەی خێری وڵاتەكەمان و چاكەی ھاوڵاتیان و تێپەڕاندنی قەیرانەكان دەستەبەر بكەین".
ناوبراو روونیكردۆتەوە "دەمانەوێ دووپاتی بكەینەوە كە سەرەڕای ناكۆكی و جیاوازی و رەخنەكان لەسەر ئاستی ناوخۆ، ھەلومەرجی سیاسی عیراق و ناوچەكەو ئاراستەی گۆرانكاریەكان ئەركی ئەوە دەخاتە سەر ھەموو لایەكمان كە گفتوگۆیەكی نیشتمانی فراوان دەست پێبكات بە مەبەستی دەربازبوون لە دۆخی چەقبەستووی سیاسی و چارەسەرێكی گشتگیر بۆ كێشەكان و ئامادەكاری بۆ قۆناغی داھاتوو و بەدورگرتنی كوردستان لەو مەترسیانەی بەڕێوەن، بۆ ئەوەی بەیەكەوە ئەو دۆخە چاوەڕوانكراوە بە قازانجی گەلەكەمان و ئارامی و خۆشگوزەرانی خەڵك و پێگەیەكی بەھێزتر لە ناو ھاوكێشەی سیاسی ناوچەكەدا دەستەبەربكەین".
ئەمڕۆ 72 ساڵ تێپەڕی بەسەر دامەزراندنی پارتی دیموكراتی كوردستان، بۆ ئەو مەبەستەش لایەنگرانی ئەو حزبە لە شارەكانی كوردستان چاكییان ئەنجامدا.
PM:04:28:16/08/2018
ئهم بابهته 7052
جار خوێنراوهتهوه
لێرەوە کۆمێنت بنوسە لە فەیسبوک دەردەکەوێت