‌ئەندامێکی ئەنجومەن زانیاری لەسەر ناردنی نەوتی سپی لەلایەن بەغداوە بۆ سلێمانی رادەگەیەنێت

وێستگە نیوز- پشتیوان جەمال

جێگری سەرۆكی لیژنەی وزە لە ئەنجومەنی پارێزگای سلێمانی رایدەگەیەنێت، ناردنی نەوتی سپی لەبەغداوە بۆ سلێمانی رەزامەندییەكی نوێ نییە و پێشتر رێككەوتنی لەسەر كراوە،  ئاماژەی بەوەشكرد، ئـەوەی دەنێردرێت تەنها لەڕۆژێكدا پێنج تانكەر واتە 180 ھەزار لیتری ڕۆژانەیە.

رێكەوت زەكی، جێگری سەرۆكی لیژنەی وزە لە ئـەنجومەنی پارێزگای سلێمانی بەوێستگە نیوزی راگەیاند، ناردنی نەوتی سپی لەلایەن بەغداوە بۆ پارێزگای سلێمانی رەزامەندیەكی نوێ نییە و بەگوێرەی هەمان رێككەوتنی ساڵی 2015یە، هۆكاری راگیرانیشی ئەوەیە ساڵانە  لە 1ی نیسان تا 1ی ئاب بەھۆی كۆتایھاتنی وەرزی زستانەوە وەزارەتی نەوت ناردن و خەرجكردنی نەوتی سپی ڕادەگرێت و لەسەرەتای مانگی ئاب دەست پێدەكاتەوە وەك ئـەوەی ئـێستا ھەیە.

ناوبراو ئاماژەی بەوەكرد، پڕۆسەی ناردنەكە زۆر كەمە و بەو شێوەیە نییە كە باسدەكرێت و هاوڵاتی لەئـێستاوە بەرمیل ئـامادە بكات، بەڵكو ئـەوەی دەنێردرێت تەنها لەڕۆژێكدا پێنج تانكەر واتە 180 ھەزار لیتری ڕۆژانەیە، لەكاتێكدا ئـەگەر ھەر ماڵێكی پارێزگای سڵێمانی بەرمیلێك نەوتی پێبدرێت پێویستی بە 107 ملیۆن لیترە، بەو جۆرە و بەو بڕەی كە ئـێستا بڕیارە بگات بۆ تەواوكردنی سەرجەم ماڵەكانی پارێزگای سلێمانی پێویستی بە 594 ڕۆژە واتە نزیكەی 20 مانگ واتە ساڵێك و نزیكەی 8 مانگ، ئـەمە ئـەگەر هەموو ڕۆژێك نەوتەكە بگات و نەوەستێت، چونكە زۆر جار چەند ڕۆژ لەسەر یەك تا ھەفتەیەك بەھۆی كێشەی تەكنیكیەوە پرۆسەی ناردنەكە دەوەستێت.

رێكەوت زەكی روونیكردەوە، بەوەشەوە ھێشتا سەرچاوەی ناردنەكە واتە پاڵاوگەكەی كە نەوتە سپیەكەی لێوەردەگیرێت دیارینەكراوەو دیار نییە، بڕیاربوو لەپاڵاوگەی بازیانەوە بگوازرێتەوە، بەڵام پاڵاوگەكە دەڵێت نییەتی!!، تائـێستاش 50 ملیۆن لیتر  قەرزاری ماڵانی ساڵی پێشوون كە بەرمیلە نەوتەكەی پارساڵیان وەرنەگرتووە!، هەروەها نرخی یەك بەرمیل نەوت ئـەگەر بگاتە دەستی ھاوڵاتی! نزیكەی نیوەی نرخی بازاڕە، واتە بێبەرامبەر نییە و دیاری ھیچ حكومەتێك نییە.

جێگری سەرۆكی لیژنەی وزی دەڵێت، ئـەگەر دابیننەكردنی خزمەتگوزاری پێویست بۆ ھاوڵاتیان تاوان بێت، ئـەوا دڵخۆشكردنی بێئـەنجام و ڕاستی پێنەوتنیان دووجار تاوانە، بگرە قۆڵبڕین و زۆر بڵێیە.

پێشتر هەڤاڵ ئەبوبەكر، پارێزگاری سلێمانی رایگەیاند لەم هەفتەیەدا بەغدا دەست بە ناردنی نەوتی سپی بۆ ماڵان دەكات.


PM:10:31:09/08/2018


ئه‌م بابه‌ته 6344 جار خوێنراوه‌ته‌وه‌‌